عصائر لصيف ساخن طبيعية ميه فى الميه

[Mona Mon]

مع زيادة ارتفاع درجات الحرارة
فوق معدلاتها الطبيعية
في مثل هذا الوقت من العام
أكيد كلنا
بنتجه إلى المشروبات البادرة
وطبعا مفيش أضمن من العصائر الطبيعية
اللي بتعمليها بنفسك

علشان كده قررنا النهارده نكون معاكي
وندخل المطبخ مع بعض
وفي خمس دقائق فقط
نعمل عصائر طبيعية فريش ميه في الميه




عصير الرمان
الرمان من الفاكهة الصيفية اللي كلنا بنحبها، وعلى فكرة تناول كوب من عصير الرمان يوميا بيحمي الإنسان من الإصابة بالنوبات القلبية المفاجئة...



المقادير:-
• 1/4 كيلو رمان.
• ملعقة عصير ليمون.
• 1/2 فنجان سكر.
• ملعقة كبيرة ماء ورد.
• 3 أكواب ماء.
• مكعبات ثلج.
الطريقة:-


1. هات الرمان واغسليه كويس، ثم قشريه وطلعي منه حبوب الرمان الداخلية.
2. حطي الرمان في العصارة الكهربائية، وضيفي إليه الميه والسكر وعصير الليمون وملعقة ماء الورد، واضربيهم كلهم مع بعض كويس.
3. هاتِ المصفاة الخاصة بالعصائر وصفي فيها عصير الرمان.
4. هاتِ كأسات العصير وحطي فيها العصير، وضيفي إليه مكعبات الثلج، على فكرة ممكن تضيفي بعضا من حبيبات الرمان الكاملة إلى عصير الرمان.

وبألف هنا وشفا


عصير الأناناس
كلنا بنشتكي من مشكلة صعوبة الهضم في الصيف، بس لو شربنا كوب من عصير الأناناس هنتخلص من المشكلة دي نهائي...


المقادير:-
• 1/2 حبة أناناس مقشرة.
• 1/2 علبة آيس كريم جوز الهند.
• ملعقة عصير ليمون.
• كوب كبير ماء.
• 1/2 فنجان سكر.
• الماء الموجود داخل علبة أناناس كمبود.
• 1/2 كوب أناناس مقطع قطع صغيرة.
• مكعبات ثلج.
الطريقة:-


1. هاتِ حبة الأناناس وقشريها، وخدي نصفها وقطعيه قطع صغيرة.
2. اخلطي قطع الأناناس مع باقي المقادير الموجودة عندك، واضربيهم كلهم مع بعض في الخلاط.
3. هاتِ المصفاة الخاصة بالعصائر وصفي فيها عصير الأناناس.
4. صبي العصير في كأسات العصير وضيفي إليه قطعا من الأناناس المقطع ومكعبات الثلج.
ولو كنت بتعملي ريجيم وعايزه تشربي عصير فريش وفي نفس الوقت تحافظي على وزنك، ممكن تضيفي إلى عصير الأناناس 1/4 كيلو كيوي مقشر وتضربيهم كلهم مع بعض.

وبألف هنا وشفا


عصير المشمش
أما بقى لو كان نفسك إن بشرتك تكون نضرة ومفيش فيها أي أثر للتعب أو الإهارق، يبقى عليكِ بكوب من عصير المشمش يوميا....وعلى فكرة عصير المشمش مفيد جدا في علاج حالات فقر الدم وضعف الذاكرة، مش كده وبس ده كمان بيفتح الشهية وبيقضى على مشكلة الأرق خاصة لو شربتيه باللبن بالليل قبل ما تنامي.


المقادير:-
• 1/4 كيلو مشمش.
• 2كوب ماء بارد.
• 1/4 كيلو لبن حليب "اختياري".
• ملعقة عصير ليمون.
• 1/2 فنجان سكر.
• مكعبات ثلج.
الطريقة:-

1. هاتِ المشمش واغسليه كويس، وانزعي منه النوى، وقطعيه قطعا صغيرة.
2. اخلطي كل المقادير السابقة مع بعض، واضربيهم في الخلاط كويس.
3. هاتِ المصفاة الخاصة بالعصائر وصفي فيها عصير المشمش.
4. حطي عصير المشمش في كاسات العصير، وضيفي إليه مكعبات الثلج.

وبألف هنا وشفا


عصير التفاح
ناس كتير ما تعرفش إن شرب كوب من عصير التفاح يوميا بيساعد على الحفاظ على مستويات الكوليسترول في الدم في حدودها الطبيعية.


المقادير:-
• 1/4 كيلو تفاح.
• 2 كوب ماء.
• 1/2 فنجان سكر.
• عصير ليمونة.
• مكعبات ثلج.
• شرائح تفاح "للتزيين".

الطريقة:-
1. هاتِ التفاح واغسليه، وقطعيه قطعا صغيرة.
2. رشي عصير الليمون على التفاح المقطع.
3. حطي التفاح والسكر والماء في الخلاط، واضربيهم كلهم مع بعض.
4. هاتِ المصفاة الخاصة بالعصائر وصفي فيها عصير التفاح.
5. ضعي العصير في كاسات العصير، وضيفي إليه مكعبات الثلج، وزيني الكأس بشرائح التفاح.


وبألف هنا وشفا



عصير الفراولة بالموز
لو كنت من الناس اللي بتحب تشرب عصير الفراولة باستمرار في الصيف، فإيه رأيك لما تجربيها بالموز هتبقى أحلى وأحلى...




المقادير:-
• 1/2 كيلو فراولة طازج.
• 1/2 كيلو لبن حليب.
• 1/4 كيلو موز.
• عصير ليمونة.
• 1/2 فنجان سكر.
• 1/2 كوب ماء.
• شرائح فراولة للتزين.
الطريقة:-


1. هاتِ الفراولة واغسليها وقطعيها إلى قطع صغيرة.
2. هاتِ الموز وقشريه، وقطعيه إلى قطع صغيرة، ورشي عليه عصير الليمون.
3. اخلطي كل المقادير اللي عندك مع الموز والفراولة، واضربيهم مع بعض في الخلاط.
4. حطي العصير في كاسات العصير، وضيفي إليه قطع الفراولة ومكعبات الثلج.

وبألف هنا وشفا

كوكتيل فواكه الصيف

آخر عصير معانا النهارده هو كوكتيل فواكه الصيف...

المقادير:-
• 3حبات مانجو مقشرة ومقطعة قطعا صغيرة.
• 3 حبات خوخ مقطعة قطعا صغيرة.
• 3 حبات جوافة مقطعة قطعا صغيرة.
• عصير ليمونة.
• مكعبات ثلج.
• 1/2 فنجان سكر.
• 3 أكواب ماء.
الطريقة:-



1- اخلطي كل المقادير دي مع بعض، واضربيهم في الخلاط.
2- صبي العصير في كاسات العصير.

وبألف هنا وشفا