أبرار :- لا والله
رنا :- إيه والله خلاص عاد
مدت أبرار يدها لرنا
رنا :- خير
أبرار :- بوسي عشان يرضون عنك الأسياد
رنا :- أنقلعي أقول
أبرار :- ههههههههههه طيب أوريك
رنا:-أقول قومي بس جيبي لي عصير أنا العروس بكره روحي جيبي
أبرار :- يوه روحي أنتي
رنا :- أفهمي العروس ما تسوي شي الكل يخدمها عقبال ما نخدمك يله يا الدبه روحي
أبرار :- رنيو أنا الكبيرة
رنا :- ذليتينا يالكبيرة أقول قومي لا ألحين بكف على وجهك
أبرار :- هع أتحداك عطتها أبرار كف وراحت تركض
رنا :- يا الدبة والله أوريك
قامت رنا تركض وراها وتبي تمسكها طلعت أبرار للحوش وهي تصارخ :- والله أتوب ما عاد اعيدها
راحت توزت في عند الملحق ماكانت تدري إن الملحق فيه أحد
أبرار :- غريبة الملحق مفتوح فرصه وجتك أدخلي شوفيها اول مره تدخلينها
دخلت أبرار وكانت منزله رأسها ما انتبهت للشخص إلي كان جوى مبهت فيها ويناظرها موب مصدق إلي أستوى فيه بدون شعور منه بصوت مسموع لأبرار :- حور أنتي جيتي
أبرار أنصدمت ما توقعت يكون فيه أحد خصوصا أنها ما سمعت صوت
قرب راشد منها يبي يتأكد هل هي خيال أو صدق راشد في باله :- والله هي هي حور
راشد :- أخيرا جيتي يا حور
صار راشد يقرب منها وهي تبعد عنه من الخوف ما عرفت وش تسوي لحد ما صدمت بالجدار تسمرت رجولها ما عاد قدرت توقف قرب راشد منها ومسكها مع يدها أنصدمت منه حست بكهرباء وقشعريرة تسري بجسمها كله
قطع عليهم صوت رنا وهي تنادي على أبرار :- أبرار وينك وين رحتي
صحت أبرار وراشد من الصدمة إلي كانوا فيها راشد حس بندم فظيع أنه ما قدر يصيطر على نفسه اول ما شافها وعرف إنها أخت صديقة هاني
قامت أبرار وراحت تركض من عنده وهي تصيح طاحت في موقف عمرها ما راح تطيح في مثله حست بالفشيلة من صديق هاني الإماراتي هي عارفه إن صديقه جاء معه بس توقعت إنهم رايحين يتمشون به ويفرجونه على الرياض
مسكتها رنا :- وين كنتي
أبرار :- بعدي عني دخلت غرفتها وهي تحمد الله أن محد شافها معه وبقربه بعد
رنا :- علميني وش فيك
أبرار :- كله منك يا حيوانه وخري عني
رنا :- أبرار
أبرار :- وش أبرار يا ويلي لو أحد شافني والله بيذبحوني
رنا :- وش صار لك
أبرار :- دخلت عليه يا الله والله يهبل
رنا :- الحمدلله ما انتي بصاحية
أبرار :- إيه والله يجنن يا رنا يجنن تعرفين حسيت بشي مدري وشو أول ما قرب مني ومسك يدي آه يذبح
رنا :- الحمدلله من هذا ما انتي بصاحية
أبرار :- الإماراتي راشد فديته والله يهبل يهبل قولي آمين
رنا :- آمين
أبرار :- جعله من نصيبي والله فنان
رنا :- قولي لي من يشبه
أبرار :- فديته ما يشبه لأي حد لأنه مميز بجد بس كل المواصفات إلي أتمناها تكون في حبيب القلب وزوج المستقبل لقيته فيه الجمال والوسامة أسمر مملوح شعره طويل وأسود عيونه ذباحه جسم رياضي طول بعرض رزة فديته والله وإلا ريحة عطره واو جفنشي يهبل يهبل
رنا :- ههههههههه أخيرا طحتي ومحد سمى عليكي ما لقيتي تحبين إلا هالأماراتي
أبرار :- وش فيه الإماراتي ما ملى عينك
رنا :- فديتهم والله هل الإمارات والنعم بهم بس أحلمي يا قلبي على قدك حبي من ربعك مو من برى البلاد
أبرار :- وش أسوي بهالقلب الله يجمعني به إن شاء الله
رنا :- إن شاء الله يا قلبي
أما بالنسبة لراشد
فكان غير مصدق للحدث إلي صار له من شوي :- أنا لازم اخطبها أخاف تروح مني مثل ما راحت حور وأنا ما صدقت ألقاها تروح مره ثانية لا ما راح أسمح
هاني :- هي رشووود
راشد :- ها شو شو مستوي غربلك الله
هاني :- ههههههههههههههه والله انك حركتات وش فيك من شوي ورائد يصوت لك وأنت ما انت معنى
راشد :- إلا معكم
رائد :- إيه واضح قوم يله خلنا نروح اليوم الشباب مسوين حفلة توديع العزوبية
راشد :- ما اعرفهم
هاني :- قم وتعرف عليهم والله أنهم مثلك وشرواك قم بس يا شيخ وسع صدرك
راشد :- يله عيل قوموا بس ها ما بنطول
هاني :- يله بس بنروح للثمامه
راشد :- ما فيه غيرها
رائد :- أحمد ربك قم بس وأنت ساكت
راشد :- شو ميسو رائد أشوفك قمت تمون
رائد :- إيه غصب عنك أمون هع يله بس قوم
في الثمامة وبالتحديد بطعس التحدي
جاسم وعادل وراكان ورائد وريان وعبد المجيد وهاني وسلطان وفيصل ونايف وراشد وعبد العزيز كانوا جالسين عند الخيمة وشابين الضو وجالسين حوله ويتقهوون
فيصل :- ها هنوي كيف النفسية
هاني :- آه بس والله إني مشتاق لبكره فوق ما تتصورون
عادل :- إلى ألحين ما درت رنا
هاني :- لا مسكينه تلقاها على نار
عبد المجيد :- الله يهدي عبد الرحمن وش المانع لو علمناها
هاني :- والله ما أدري عنهم حاولت اعلمها بس ما قدرت
عبد المجيد :- أبرار تدري
فز قلب راشد أول ما سمع طاري ابرار
هاني :- إيه وهي إلي مخططة لكل شي
عبد المجيد :- خبله ذا البنت
هاني :- والله كلهم خبلات يله بس خلنا منهن ألحين وقلي متى نويت
عبد المجيد :- أنا أبي أكون أخر واحد عشان أكون سبيشل
فيصل :- لا انا وياك بيوم واحد
عبد المجيد :- يا أخي قلق أنت وش أبي فيك
فيصل :- ترى ها مي اختي
عبد المجيد :- لا والله وترى هند اختي بعد
فيصل :- ها إيه والله إنك صادق لا أجل سو إلي يعجبك
عبد العزيز كان لاهي بالجوال يرسل لدانه رسائل
تصدق كلمة أغليكم غلا حيل ما تكفي
أنا ودي بكلمة ما لفظها في البشر غيري
تعبر لك عن أحساسي تبين منتهى وصفي
تبين لك معاناتي مع شوقي وتعبيري
دخيلك شق بصدي شف وش بينت وش مخفي
ترى كلي كلام وما قدرت أعطيك تفسيري
دانه :- زيزو احبك
عبد العزيز :- يا بعد هالدنيا انتي وأنا اموت فيك
دانه :- زيزو وش تتمنى ألحين
عبد العزيز :- تكونين بجنبي ألحين ويدي ما تفارق يدك
دانه :- نفسي اكون بحضنك
عبد العزيز :- آه يا قلبي
قام عبد العزيز عنهم
سلطان :- وين رايح
عبد العزيز :- وش عليك
سلطان :- أها بتكلم المدام
عبد العزيز :- مدامتي وانا حر وش عندك يله شوي وجاي وبلا حركات ماصخة اعرفك ترى
بعد عنهم والكل يضحك عليه
ركب للسيارة وأتصل على دانه وبعد رنتين ردت عليه بصوتها الناعم :- ألوو
عبد العزيز :- فديت الألو أنا
دانه :- يا قلبي انت
عبد العزيز :- دانه
دانه :- لبيه يا روح دانه
عبد العزيز :- تحبيني
دانه :- اموت فيك
عبد العزيز :- يا ويلي انا بتذبحني هالبنت وش رأيك اصارخ وأقول لكل الناس احبها والله العظيم احبها
دانه :- وانا أحبك تدري أول كنت اغني اغنية
عبد العزيز :- وش الأغنية
دانه :- وينك بغيت أحط واحد بديلك
واحد بغى في الحب يأخذ مكانك
واحد لعبي لعب الله وكيلك
لو ما نهيت القلب روح مكانك
عبد العزيز :- يا بعد عمري
دانه :- زيزو
عبد العزيز :- روح وقلب وعمر زيزو
دانه :- شوي شوي علي ترى اموت كذا
عبد العزيز :- بسم الله عليك يومي قبل يومك قولي آمين
دانه :- الله لا يقوله وش تسوي ألحين
عبد العزيز :- مشتاق مشتاق مشتاق لك موت متى بشوفك
دانه :- يوم الزواج
عبد العزيز :- الله لا يا قلبي أبي أشوفك وبسرعة بعد
شغل عبد العزيز المسجل وكان فيها أجيك يسلم رأسك لراشد الماجد وجلس يغني معه
أجيك يسلم رأسك وشلون ما أجيك
وياك أنا بالذات صعبة اتغلى
والله مدري من الغلا وين أوديك
تسوى عيوني ولا بعد يمكن اغلى
لا جيت انادي غيرك اسهى واناديك
غصب علي ياليت أركى تدلى
روحي تنادي لك وقلبي يناديك
عليك ما في دنيتي شي يغلى
أمر تدلل مالك إلي يرضيك
قدرك على كل الخلايق تعلى
قلن تغلى مير زدت بتغليك
والناس قالوا من تغلى تخلى
دانه :- بتخليني
عبد العزيز :- مستحيل أخيلك أسمعي يا بطتي أنا بكره بجيك ما علي منك فاهمه
دانه :- بكره لا نسيت أنها ملكة رنا وهاني
عبد العزيز :- وش علينا منهم
دانه :- لا يا زيزو كيف وش علينا منهم لازم نحضر مع العائلة
عبد العزيز :- بس بشرط أنا أوديك للمشغل وبتوريني شكلك بعد ما تطلعين
دانه :- من عيوني
بالنسبة لهند وفيصل
فيصل في نفسه :- وش تسوي ألحين يا حياتي خليني أكلمها بس
فيصل :- ما ودكم تمشون
عبد المجيد :- لا بنجلس شوي
فيصل :- مليت خلونا نرجع
عبد المجيد :- الحمد لله وش مليت منه قوموا بس نرقص ونوسع صدورنا
فيصل :- لا والله نبي نسمع أخر كتابات هاني
هاني :- أنا والله من زمان ما كتبت بس دقيقه خلني أشوف انا حافظ كذا قصيدة من إلي يحبهم قلبك
فيصل :- لا ما نبي من غيرك نبي كتاباتك
هاني :- والله ما كتبت اول ما اكتب راح اقولكم يله انا أستأذنكم ألحين انا وراشد
عبد المجيد :- بدري
هاني :- أي بدري بكره وراي مسؤلية وراي ملكة وعرس يله مع السلامة
راشد :- مع السلامة
الكل :- بحفظ الله
ركب راشد مع هاني وكان طول الوقت يفكر وسرحان يفكر في ابرار كيف إنها ردت له الامل بعد ما فقده كيف إنه شاف فيها حور
هاني :- راشد
راشد :- هلا
هاني :- وش فيك
راشد :- سلامتك ما فيني شي
هاني :- اكيد
راشد :- إيه ما فيني شي
أما بالنسبة لابرار فهي جلست طول الوقت تفكر في راشد
في أقل من دقيقه سلب عقلها وقلبها وكل ما فيها حست بإحساس هاني ورنا بإحساس هند وفيصل بإحساس الجوري وراكان حست بإحساس جاسم اخوها حست وحست وحست لحد ما انفجر راسها من التفكير صرخت من قلب:- بس خلاص تعبت من التفكير أوف
طل عليها جاسم ورائد وكانوا توهم واصلين من الثمامة :- خير اختي وش فيك
أبرار :- ها لا ما فيني شي سلامتك
جاسم :- أكيد
ابرار :- إيه اكيد
رائد :- والصرخة هذه وشي
أبرار :- احم لا بس رأسي يوجعني
رائد :- سلامتك مع اني أحس أنه فيك شي ومخبيته علينا
أبرار :- لا وين اخبي
طلع رائد وجاسم وجلست ابرار لحالها :- بدل هالتفكير الغبي إلي راح يوديني في ستين داهية خليني اكلم رنا وأشوف أخذت جوالها وأتصلت على رنا إلي كانت الثانية سرحانه بس سرحانه في عريس الغفلة مثل ما اطلقوا عليه شلتها المتواضعه
ناظرت رنا الجوال وطالعت الرقم وردت بدون نفس :- ألو
أبرار :- هلا السلام عليكم
رنا :- وعليكم السلام
أبرار :- كيف الحال
رنا :- لا والله خير أحد يتصل في هالوقت
أبرار:- إيه عادي انا مو أي وحدة أنا بروره
رنا :- يع وش هاللقلب
أبرار :- رنيوه
رنا :- يا خير وش تبين
أبرار:- متضايقة
رنا :- خير وش فيك
أبرار :- مدري بس والله صدري ضايق
جلست رنا على حيلها هي أصلا ما نامت كانت تفكر في هاني وتفكر في بكره وتفكر كيف راح تقابل زوجها بكره بعد ما يتملك عليها هل بيطلب يشوفها أو لا
رنا :- أبرار قلبي علميني وش فيك
أبرار :- أحبه وربي ألحين حسيت فيكم ما توقعت أبد إني بحبه كذا
رنا :- أبرار وش ذا الكلام
أبرار :- كل وحده فيكم حبت ليه انا بعد مالي إحساس مثلكم
رنا بعد ما تغير صوتها :- أكيد لك إحساس بس تتوقعين نهاية الحب هذا وشو هل راح تأخذينه مثل هند والجوري أو لا مثلي
أبرار :- مدري بس
رنا :- أبرار لا تفكرين في الموضوع ألحين وإلي الله كاتبه بيصير أدعي في صلاتك انه يكون من نصيبك
أبرار :- إن شاء الله رنا أسفه ضايقتك بكلامي
رنا :- لا يا قلبي عادي
أبرار :- أكيد
رنا :- إيه اكيد ليه ؟
أبرار :- طيب أضحكي
رنا :- مالي خلق أضحك وبعدين يا دبه على وشو اضحك ما فيه لا نكته ولا شي
أبرار :- طيب أممممممممم هههههههههههههههه خلاص لقيتها
رنا :- بسم الله عليك وش لقيتي
ابرار :- فيه محشش راح يعزي ناس ميت أبوهم قال هم وش كان يشتغل الله يرحمه؟قالوا حفار قبور. قال من حفر حفرة لأخيه وقع فيها
رنا :- هههههههههههههههه فديتك والله
أبرار:- إيه هذه رنا إلي انا أعرفها طول الوقت تضحك رغم المصاعب إلي مريتي فيها بس تصدقين عمري ما شفتك متضايقه إلا ألحين
سكتت رنا وبلعت ريقها :- لأني كنت أستمد قوتي بعد الله بحبي لهاني وحبه لي كان يعرف لما اتضايق يجي عندي ويواسيني سوى المستحيل عشاني حتى تذكرين يوم تروح عليه رحلته من كان السبب إنه أنا يوم أبوي يضربني وادخل للمستشفى ومن إلي وداني لأمي أول ما كانت امي عند خوالي لو اعدد لك وش كان يسوي لي والله لو ألف العالم مثل هاني ما راح القى طيبه ورقه قلب أبرار أنا احبه من كل قلبي بس دائم الحظ ضدي في كل شي أنا وجه نحس للي حولي أبرار ودي اكلمه ودي أسمع صوته
جاها خط إنتظار وأول ما شافت الرقم شهقت
أبرار :- وش فيك
رنا :- هو هو
أبرار :- رنو وش فيك من هو
رنا :- هاني يا أبرار هاني كلمني
أبرار :- لا تردين عليه إنتي ألحين ما أنتي بعصمته ولا بذمته أنتي لواحد غيره
رنا :- ما أقدر ما أرد عليه يله باي قبل ما يسكر الخط
أبرار :- على راحتك مع السلامة
رنا :- في حفظ الله
رنا :- ألوو
هاني :- لا كان أنتظرتي شوي كان ما رديتي علي
رنا :- هاني أنا
هاني :- انتي وشو ها من كنتي تكلمين
رنا :- أكلم أبرار
هاني :- لا يا شيخه
رنا :- والله العظيم كنت أكلمها وبعدين من انت عشان تسأل
هاني :- أنا
رنا :- إيه أنت لا أبوي ولا أخوي ولا حتى بلعت ريقها
هاني :- ولا إيش ليه سكتي
رنا :- لا ولا شي وش تبي ألحين
هاني :- أبي سلامتك يابنت العم حبيت ابارك لك قبل الناس
رنا :- يعني أنت موافق إني أكون لغيرك
هاني :- إيه موافق موافق إنك
رنا :- أوكي مشكور مع السلامة وعلى العموم حتى أنا من زمان وافقت عليه أشوى إني ما رفضت عشانك
هاني :- وش تقولين
رنا :- جاك العلم
هاني :- رنا
سكرت رنا الجوال في وجه هاني وضمت المخدة وجلست تصيح ودموعها تنزل بهدوء وصمت
أرسلت لها مقطع صوتي بصوتها وهي تغني
أبوس رأسك يازمن ما عاد فيني للجراح
خلاص يكفيني أسى أبوس رأسك يازمن
يا مكثر ذنوبك معي ما كل ذنب لك يباح
إن هو زعلك إش تستفيد وش مكسبك من ذا الحزن
سمعها هاني وسمع صوتها وهي تغني حز في خاطره حزنها وضيقت صدرها عليه
أرسل لها رسالة :- تزعلين وتشغلين القلب هم فوق همي
وأنتي أعلم بالخفوق وسقمه إلي مبتليني
جازلك حزن(ن) بعيني ؟ أو عشقتي نزف دمي ؟
يا عذابي ليه صرتي تزعلين وتزعليني ؟
احبك يا بطه
قرت الرساله وسكرت جوالها وحطته بالدرج وحاولت انها تنسى كل شي صار لها منه وتنسى كلامه
راشد كان طول الوقت يفكر في أبرار أخذ جواله واتصل باخوه ناصر
راشد :- ألو
ناصر :- هلا أخويه هلا برشود وينك يبه ليه تاخرت
راشد :- أنا بالسعودية اليوم وصلت بحضر زواج ربيعي وبجي لدبي
ناصر :- هيه مبروك منو ربيعك لا يكون هنوي
راشد :- هيه هاني
ناصر :- مبروك وعقبالك
راشد :- آمين
ناصر :- شو شوقلت
راشد :- نصور أباها والله أباها
ناصر :- من هي من تبى
راشد :- أبرار حور
ناصر :- شو ما فهمت عليك أرمس زين
راشد :- أبرار أخت هاني
ناصر :- وليه أبرار تزوج وحده من بنات عمك
راشد :- لا ما أبي إلا أبرار
ناصر :- رشود
راشد :- تكفى يا ناصر أبي أبرار لا تجبروني على شي ما أبيه
ناصر :- أنت تعال لدبي ومايكون إلا خير
راشد :- لا أنتوا تعالوا واخطبوها لي الأيام هذه
ناصر :- وليه مستعجل
راشد :- أخاف تروح من يدي تكفى نصور تعال اخطبها لي
ناصر :- طيب تعال ونتفاهم
راشد :- لا ما راح أرجع لدبي إلا لما تخطبها لي
ناصر :- خلاص يبه بكره بنجي ونخطبها لك وش تبي بعد
راشد :- صج والله
ناصر :- هيه صج أنت كلم أخوها وخله يرمس أهلها وإحنا بنييهم الأسبوع الياي
راشد :- توك تقول بكره شله الأسبوع الياي
ناصر :- عنبوه شله هالإستعجال خلاص تريا شوي انت بس كلم أخوها عشان يرتب لنا موعد مع أهلها
راشد :- طيب يله مع السلامة
تنهد راشد بعد ما سمع الخبر من اخوه وأرتاح إنها بتكون له :- آه يا أبرار بتكونين لي بدل حور بس أخاف ما تبيني
طق هاني عليه الباب بعد ما شاف الانوار مشغله
راشد :- منو ؟
هاني :- انا
راشد :- حياك دش
دخل هاني على راشد وهو ما زال على وضعيته السابقه
هاني :- سلام
راشد :- هلا وعليكم السلام
هاني :- ما نمت ؟
راشد :- لا
هاني :- شفيك ما نمت
راشد :- ما شي موب جاييني النوم
هاني :- آها حتى أنا موب جايني نوم نقوم نطلع
راشد :- شفيك غريبة وبكره ملكتك على حبيبة القلب
هاني :- آه خلها على الله الله يستر من بكره
راشد :- ليه شو مستوي بك
هاني :- لا ولا شي قم أحس مخنوق قوم خلنا نطلع
راشد :- قوم يله
طلعوا هاني وراشد كان في باله أنه يقول لهاني عن أبرار
اليوم هو اليوم الموعود لكل من هاني ورنا إلي ماتدري من هو عريس الغفله
من الصباح وحالة هيجان في جميع البيوت البنات راحوا للمشغل وتجهزوا
رنا جتها كوافيرة من مشغل معالي تزينها
هاني كان عند العمال في الحديقة الخارجيه يزينون لها كوشه وكانت هذه هي أول هديه يهديها لها هاني
فهد ورائد وجاسم راحوا يجبون الزل ويفرشونه في الشارع
عادل وراكان يركبون العقود إلي تزين بيوت العريس والعروس
عبد المجيد متكفل بالبنات هو وفيصل
ريان رايح عشان المطبخ عشان العشاء
وعلى المغرب كان الكل جاهز البنات جو عند رنا وكانوا مسوين لها سربرايز أو بالأصح هاني مسوي لها سربرايز
دخل الشيخ وجلس بين عبد الرحمن وهاني
الشيخ :- أين العريس
هاني :- حاضر
الشيخ :- أعطني البطاقة
طلع هاني بطاقة الاحوال وأعطاه للشيخ
الشيخ :- أين ولي أمر العروس
عبد الرحمن :- نعم
الشيخ :- البطاقة لوسمحت
طلع عبد الرحمن البطاقة واعطاه إياه مع ورقة التحليل لهاني ورنا وكانت النتيجة سليمه
الشيخ :- قل يا ولدي زوجني أبنتك على سنة الله ورسوله
هاني :- زوجني إبنتك على سنة الله ورسوله
الشيخ :- قل يا عبد الرحمن زوجتك أبنتي على سنة الله ورسوله
عبد الرحمن وهو مبتسم لهاني :- زوجتك بنتي على سنة الله ورسوله
الشيخ :- باقي موافقة العروس عطوها الدفتر عشان توقعه
أخذ فهد الدفتر وراح لغرفة رنا وكانوا البنات كلهم عندها طق الباب
رنا :- مين
فهد :- أفتحي الباب معي الدفتر عشان توقعينه
رنا :- ها لا ما أبي أوقع وبدت تصيح
أبرار :- وش قاعدة تقولين
رنا :- ما أقدر أوقع وهاني يا أبرار وهاني ليه كذا
أبرار :- رنا وقعي لتسوين لنا فضايح
رنا :- ما أبي أوقع
فهد :- ها بتوقعين وإلا أقول لأبوي
رنا :- ما أبي أوقع غصب
فهد :- بكيفك بقوله اجل
هند :- لا أصبر لاتروح عطني الدفتر
فهد :- خذي وبسرعه خليها توقع الشيخ مستعجل
أخذت هند الدفتر وقرت أسم العريس
هاني سعد ....
وضحكت هند بقوة خلت الكل يستغرب من ضحكتها
أبرار :- وش فيك تضحكين كذا
هند وهي تناظر رنا :- متأكده ما تبين توقعين
رنا :- إيه
هند :- راجعي نفسك
رنا :- ما أبي
هند :- خلاص يا فهد خذ الدفتر وقل لهاني رنا ما تبيك توكل على الله
فتحت رنا عيونها ماهي مصدقه الكلام إلي سمعته
رنا :- وش قلتي
هند :- انتي ما تبين توقعين خلاص يروح يقول للعريس أن رنا ما تبيك
رنا :- ومن العريس
هند :- يقال أسمه هاني بن سعد بن ....
جت رنا تركض للدفتر أخذته من هند وجلست تقرأه دمعت عيونها من الفرحة اخيرا هي بتصير حرم هاني بس بعد التوقيع على الموافقه
وقعت رنا بكل خوف ويدها ترتجف ودموعها تنزل بس دموع فرح ماكانت مصدقه وغير كذا عتبانه عليهم ليه ما علموها من هو العريس
جو البنات لها وباركوا لها وأول ما جت أبرار لها تبارك لها ناظرتها رنا من فوق لتحت وكانت عتبانه بقوة :- ليه ما قلتي لي إن هاني خطبني
أبرار:- ما كنت ادري
رنا :- لا تكذبين
أبرار :- والله العظيم ما كنت ادري بشي
ضمتها رنا وهمست لها بإذنها :- الله ينولك إلي في بالك وتعيشي معه مرتاحه يا رب
أبرار وهي تصيح من الفرحة لهاني ورنا :- آمين يارب
مي :- حشى كل هذا مباركه يله تجهزي عشان تنزلين الكل يستناكي تحت
رنا :- ها وش قلتي
مي :- قلت لك يله عجلي
مشت رنا على انغام الزفه وكانت بين البنات ينثرون عليها الورد والجوري
أقبلت يا قبلة الله في حلاها
شمعة الدنيا ضوت بين العمر
أقبلت والكل يمشي من وراها
ونت انا من زينها ليل السهر
هي صبا شمس تعلت في سماها
هي ملاذ الارض في وقت السحر
من شذاها تاخذ بدنيا شذاها
لا دخون ولا عبير ولا عطر
يا هنيك يا هاني فزت بغلاها
فزت بإلي نورها شمس وقمر
الخزامى والنفل ريح لهواها
لا مشت ريح البسيطة ينتثر
ربي هو إلي وهبها ثم عطاها
في حلاها وزانها بأحلى الصور